你當全部人都借9成？
我依家收租既樓有租客幫我供息同本
夠cover 有突
根本借8，9成按係少數
其實香港人根本好多人有錢
唔計交profit tax 做生意果班
交salary tax 既有20%收入40k過外
兩公婆加埋已接近10萬
買樓供樓根本唔成問題
而且香港有60%業主已供滿樓，早年買落計 cash on cash return on investment 50-60厘都唔奇
你唔好用租租既角度去諗業主既cash flow
同親啲 A 準傾呢家嘢永遠都係咁無限 loop，我個租客同我供梗樓，香港人人都好有錢，香港個個層樓都供完，銀行壓測測到你冇事就乜都唔驚 blablabla ...
你講嘅係你自己或者你個客或者你想像出嚟嘅個别例子，我同你講嘅係依家喺差餉物業估價處睇到今時今日大圍嘅數據，今時今日嘅息口環境。
香港幾多有錢人、大陸幾多有錢人都好，樓價都係取決於最近嘅成交，小數冇咁多錢嘅人還唔起債掟貨，呢一手成交就決定今日嘅市價，整體樓價就會跌。
反而啲有錢佬幾廿年前低價揸貨，見到個跌勢唔對路佢哋更有條件低價出貨，香港多有錢人多人供完層樓唔代表佢哋事必要 strong hold，我幾廿年前廿零三十萬買個單位，依家劈低十零廿個巴仙情願快快手手出貨之後過英國揍孫，咁都可以揸返幾百粒喺手查實一啲都唔會覺肉赤，呢班有錢冇負債嘅人亦可以係一個推低樓價嘅動力。
任何物價無論有心人短期點炒，長遠定價此終係睇供求，香港大陸甚至亞洲好多發達經濟體都經歷梗好嚴重嘅人口老化，但佢哋人口衰退都係逐個逐個巴仙咁衰，
但香港廿幾三十歲呢個年齡層家陣係一下子唔見咗十幾廿個巴仙人口，我認我老餅，廿歲嗰浸應該好多冇家室冇乜負擔隻身咁去嗰班唔喺我親身嘅觀察範圍，
以我親身睇到嘅好多係三十零歲，主要係唔想啲仔女喺香港受教育，心態係點辛苦都要帶啲仔女去外國讀書嗰班，佢哋走咗本身已經係帶走短期樓市一個好誇張嘅購買力，
而更大嘅問題係佢哋亦帶走埋一個好長遠嘅購買力，啫係嗰班佢哋唔想放喺香港受香港教育嘅仔女。
香港同大陸本身後生嗰班都好重躺平嘅心態唔想生，所以依家香港出生率長期處於全球倒數 top 10 top 5，呢吓一下子冇咗嗰廿個巴仙對樓市最有需求嘅人口其實係好難補充返，你話放大陸人落嚟就搞掂，查實家陣大陸本身人口老化都好嚴重，加上好多大陸移民查實只係補充到香港嘅勞動力而唔係落嚟投資；工作關係我身邊見到好多呢班新移民，當中好多都係落嚟香港打份濕勁牛工，排隊上公屋或者租間湯房過日子，呢班移民對頂住家陣個濕勁市幫助其實唔係咁大。
