鄧兆尊昨日為「田祖豪3寶」的YouTube Channel擔任客席主持，與貴花田和曾志豪大談電視台的待遇秘聞，其中「娛樂圈Q&A」有不少網友向兆尊提出問題，對於TVB和ViuTV的競爭越來越白熱化，TVB竟然改口不公布其他電視台收視，鄧兆尊說：「其實好多細節都睇到，好似金像獎頒獎禮都有好多TVB人有去，大家都冇嘢。我相信幕後高層傾過偈，有啲嘢互動緊，表面上唔方便講，係良性競爭，我都等睇MIRROR上『獎門人』。（點解要唔公布收視？因為失勢？）獎門人親自出馬呀嘛，好就話啫，追唔番以前收視又唔會開心，但要追以前收視真係好難......唔方便輸畀啲細嘅小朋友，係咪先？」
兆尊雖然是TVB出身，不過近年他回歸自由身，又擔任過ViuTV和香港開電視的節目嘉賓。對後起之秀的ViuTV，兆尊說：「大台始終幾唔好都好，內部管理好好，我之前返TVB拍修哥（胡楓）大壽個節目，5、6部攝影記一齊去拍，啲嘢好快！但另一個台我去拍嘢，導演同收音師講：『個咪唔係好得，換過佢！』，點知個收音師話：『咁我入倉攞！』，點知個導演話咁話唔使喇！仲有佢哋約你幾點，例如約我六點去到，點知一去到就話大家要放飯，我坐兩個鐘頭等佢放飯，冇所謂，但佢內部溝通好有問題，管理層要做吓嘢！」
貴花田大感驚訝，認為沒可能要嘉賓等兩小時，兆尊說：「呢個算小事，以我過往經驗，做完嘢就會畀單你簽就出糧，我去某一個台，我唔講邊間啦，佢問我拎invoice，佢話要再遞上會計部，30至60日就會畀錢我，我真係從未見過。我去拍係因為幫朋友，啲錢少到出一出街都用完，但拖足40日先收到錢。錢銀真係唔係大問題，只係希望佢做好啲，唔好令人覺得委屈，點可以收音仲惡過個導演呀？」
曾志豪和貴花田都對此嘖嘖稱奇，兆尊繼續分享一件更過分的事，他說：「有個好好笑嘅真實故事，過年時間
有一個台搵我，話過年想帶歡樂畀大家，叫我突擊去幾間食肆派利是畀食客，不過利是係我出，仲要係請埋啲人食飯，當開工飯，三圍人！」兆尊有感事件太過分，最終回覆對方指希望可以廣邀記者同場，原因是：「我叫埋記者嚟，你唔介意呀嘛？你個台做啲嘢咁先進，真係要畀其他電視台認識仿傚一下！點知佢之後唔理我！」曾志豪笑言原來TVB的「無言感激」利是已經算不錯，兆尊說：「對比起，已經算好有愛心！」
至於提到經理人長約的問題，兆尊坦言當年無綫提供四款合約，不過見他是新馬司曾的囝囝，相信他是學習為主，將兩份高薪的合約拿走，最終他不想被無綫綁足七年，就簽下一個月五個騷，每個騷500蚊的條款，他說：「月薪2500蚊，真係油錢都唔夠畀！」
https://skypost.ulifestyle.com.hk/article/3320278/%E9%84%A7%E5%85%86%E5%B0%8A%E7%88%86ViuTV%E5%85%A7%E9%83%A8%E6%BA%9D%E9%80%9A%E6%9C%89%E5%95%8F%E9%A1%8C%20%E8%A2%AB%E6%9F%90%E5%8F%B0%E7%95%B6%E6%B0%B4%E9%AD%9A%E5%80%92%E8%B2%BC%E6%8B%8D%E7%AF%80%E7%9B%AE%E6%B4%BE%E9%8C%A2%20
