走入困境的「呃錢黨」近日似乎改施美人計，懷疑派出少艾成員以姊妹花姿態登場，穿上睡衣短褲變身「少女睡衣黨」，同時下調討錢銀碼至5大元，務求降低大家的警戒心密密手收5元，圖個山大斬埋有柴。

facebook群組「屯門友」早前（8月23日）代街坊發帖，上載兩名女子的背影圖片，指當日「16:01喺（屯門）兆康輕鐵站圖中兩位著睡衫上衣少女周圍問人拎5蚊搭巴士，佢問我，我話無，佢哋就行返入商場，睇衣著外型似住附近」。

隔著輕鐵站拍攝的相片中，兩名啡髮女子穿上一藍一黃疑似睡衣，下身穿同款的灰色短褲，其中一人疑穿拖鞋，另一人邊行邊按手機；路上周圍有其他行人，輕鐵站也有候車乘客。

網民肆意調侃：做個朋友先
網民見到少女背影格外醒晨，調侃「居然仲有呢啲」、「籌旗夾公仔」，笑言「如果問我，起碼畀5舊（$500）啦！」，並心急和兩人「做個朋友先」。

有人痛心無遇上——「哎呀，琴日錯過咗今日去碰下運氣先」；有人則直言「少女問拎5蚊，同大媽問拎5蚊可以爭好遠」。面對「靚唔靚先」的查問，有眼尖網民見微知著，稱「對面個男人眼尾都唔望一下，應該唔係好嘢」。

心軟又好心地的網民則認為「幫到就幫」、「5蚊就幫吓人啦」、「5蚊啫，可能真係有需要呢」、「其實有冇諗過人哋真係有需要？況且就算真係呃你，都係$5啫……人情冷暖」、「我寧願被騙5港幣。如果她們真的需要的話，數量是很少的，但是當需要的時候，卻是非常重要的」。另有人醒目地採這方法「問佢要去邊，幫佢買輕鐵飛，$就唔會畀」。

有人正經地感慨「社會搞成這樣」，建議「報警求助」、「應該同佢報警處理」、「報警啦！有手有腳唔去做嘢問人攞錢」、「叫佢哋去屯門警署」。有人則奇怪「呃錢都唔用下個腦，想問你5蚊可以搭乜車」。

有心水清的網民看穿「呃錢黨」伎倆，表示「行過路過唔好錯過，見親一個搲番一個，落一落街返到屋企期望搲到一餐半餐」、「山大斬埋有柴，一個$5，10個$50，100個唔Ｘ駛做好過去搶」、「每人5蚊，都幾和味」、「根本係大食懶冇工開，湊湊埋埋$5x10就可醫肚」。

還有人妻透露「一人畀$5， 好快夠錢買包煙～有啲人無散紙，可能畀$10-$20～ 博下～我老公試過，佢話幫到人～係學生妹」，並醋意大發地稱「試下學生哥佢畀唔畀～」，回應的人坦言「學生妹係有優勢」；有人卻不齒地批評「咁後生自己唔去搵錢，要問人攞幾蚊咁肉酸？」。
「少女睡衣黨」逐張睇 ＋ 網民零捨精神回應

雖然留言的網民都懷疑相中女子為騙徒，但卻有人批評「您影佢有用咩？都無正面圖，我話係男人都得啦！」，並質疑「有啲人很無聊喜歡看圖作文，胡亂寫都得」。

不過，有屯門街坊倒認出相中兩人，列明地點表示「尋晚喺建生都有出現」、「我剛剛去兆康～都見到佢哋！問我有無錢？當然有錢在身！我解釋唔到～點解要畀錢你？我接受唔到囉！」、「3點幾喺龍門居都見到佢兩個」。