【高息環境投錯地 恒地中伏心急撲火】
養兒一百歲，長憂九十九。
恒基創辦人李兆基好多年前都已經交捧比兩位太子。不知不覺，四叔長子李家傑今年都已經「登陸」﹐細仔李家誠早已「入伍」。不過，兩位似乎仲要年屆95歲嘅四叔擔心。🧓
地產界近來最大隱憂，當然係息口高企。長實早幾年前已經開始部署賣產減債，但係恒基今年就有兩大壇棘手嘢。先係2017年用天價238億元投咗中環美利道甲級地皮重建而成嘅The Henderson，今年落成兼入伙，但聽聞出租率得五成，即係半棟樓係吉嘅。另外，2021年佢哋亦用咗508億摸頂投到中環海濱地皮。當日投得呢塊地之後，恒基老臣子林高演就曾經話：「目前低利率環境，唔借錢做生意，就等同唔識做生意。」
佢梗係可以口嚮嚮，事關要四叔私人荷包借600億比恒地。情況就好似後生仔靠父幹買樓，無阿爸幫手點上車？如果四叔無出手，今日恒地嘅淨負債比率點止24％，即時抽高到42％啦！
當日投中環兩幅地口價咁勇武，未經歷過風浪嘅兩位太子又點估到今日息口抽高。唔計四叔借出嚟嘅600億，恒地總債務有900幾億，恒地未來兩年要還嘅短債大約係500幾億，所以近期恒地都要發債同市場伸手。不過，家陣賣地收入又減少，商場又少咗人流，The Henderson仲有一半租唔出，海濱地皮又要開始起，仲未講新界嘅農地。無乜資金回籠，但又要開始找數，可謂前無去路，後有追兵。
雖然有富爸爸做後盾，但四叔都95歲，兩兄弟都知唔可以鬆懈，所以李家誠終於開聲俾壓力政府撤辣，「若政府沒有新的措施出台，且沒有特別利好的因素出現，下半年地產市道將甚為低沉」！不過，恒地可唔可以自救，估佢地都知道始終都要睇息口走勢，借林高演兩年前嗰句說話：「目前高利率環境，借錢做生意，就等同唔識做生意。」呢位恒地老臣子，已鮮有插手公司日常事務，留返機會俾太子表現嘛。
