原本呢啲係我家事，不過多L謝林津會長，搞到我要家事寫公開post。

7月4日

爸爸約我食午餐，爸知我鍾意西餐，所以叫咗我去某pizza店，2個人叫咗一個pizza一個沙律。老豆食咗一塊就話「冇胃口喇，你食啦，我有啲嘢要講你聽，你邊食邊聽啦吓」

佢話治療唔理想，自己覺得半年內就會離開，所以要交帶吓身後事。其實年初已經交帶咗一次銀行、文件等等身外物嘅處理。可能呢啲就係面對死亡漸近嘅接納過程吧。

食完之後爸爸陪我行到落車站，老豆嘅樣有啲不捨，我話「你好啲胃口再食啦」，想唔到爸爸講嘅半年內，結果只係十日。

爸爸交帶落三個任務。

一，通知 姨媽 姑姐 大伯
簡簡單單祈個禱，直接火化就得；
唔洗通知教會住，安撫哂屋企人，搞完哂火化先通知，唔搞公開聚會啦。

二，保護媽咪，睇住阿哥。

三，有一件事，關於另一個牧師，若有必要就代爸爸做一個證。

----------------------------------------------

「你拎左啲灰，火葬場出面就有個地方可撒，又或者你唔怕煩就撒落海啦」
聽到呢句我有啲錯愕，錯愕嘅唔係內容，而係爸爸嘅平靜，聽落唔憂愁得黎仲有啲好笑，對火葬場真係「好熟架步」。

對於老豆嘅簡約，我都有啲疑惑，細個個時我仲成日笑老豆係「喪禮牧師」，因為成日聽到「今晚唔係度食飯，喪禮呀」。所以我都再三問爸爸真係唔做禮拜？教會呢？

爸爸解釋講 幾個大原因：
唔洗搞聚會，信耶穌，死係好少嘅事。
第一，
免我地要同教會協調咁麻煩。
第二，
如果要搞，佢又唔想某啲人係佢嘅安息禮拜講嘢，但佢又唔想同人解釋原因，更加唔想我同教會解釋邊個OK 邊個唔OK(去返第一點)。咁不如唔好公開聚會仲好。
第三，
教會入面***部份人***，包括牧師同教友，對佢開放教會比示威者休息同埋佢經常對社會不公發聲，都有微言/不滿。如果公開聚會，可能唔少黃絲都會黎，「唉，到時又麻煩架啦」

爸爸雖然係一個敢於發聲嘅人，但佢都係一個好怕紛爭嘅人。
例子: 群眾話升級，佢就同幾十個宗教領袖去龍和道，想減少衝突。(我嘅睇法係阻住大家)

爸爸嘅三個主因唔搞公開聚會，都係想免麻煩同紛爭，爸爸覺得唔搞就可以免屋企麻煩，又保護到教會。爸爸亦唔想同外人解釋點解唔公開聚會，尤其第二同第三點，因為講出黎就已經係分爭。

爸爸萬萬都諗唔到教會會係佢同屋企人都話唔搞之下，夾硬搞。

爸爸意思就係唔想多講原因，所以我連阿媽同阿哥都冇解，總之就話爸爸唔想搞公開聚會。不過屋企人，始終都有少少概念。

我忍到今日，先將爸爸呢三個原因講出黎，因為我仲想教會有回轉。但而家睇黎打風都打唔甩教會嘅執念。

教會仲有人要話唔信屋企人講嘅遺願，又話或者話我地誤解爸爸唔喪禮嘅意思，爸爸亦刻意交低左我電話比教會總會。