鐵騎士遭寶馬撞斃遺兩幼女 遺孀啜泣：日日都唔知自己做緊咩 行屍走肉咁

【11:47更新】涉嫌危險駕駛導致他人死亡的42歲姓林寶馬司機，警方指准他保釋候查，12月下旬須返警署報到。

「兩個女會問點解見唔到爸爸，淨係可以講爸爸去咗好遠嘅地方，上天堂準備定啲嘢畀我哋」，11月中一場懷疑衝燈車禍，奪去兩女之父的性命，破壞一個大好家庭，死者的遺孀黃太今日接受《蘋果》訪問，坦言事件已過半個月，但仍未能接受事實，兩名年幼女兒更不時向她查問爸爸的去向，令人無限惋惜。

據知，死者黃志雄（阿雄）是家中經濟支柱，多年來勤奮工作，可惜人生路上荊棘滿途，曾經最少兩次要轉行謀生，包括早年在ifc一間電訊公司工作，其後轉行在旺角太子經營食肆，可惜也倒閉收場，最後轉到電訊盈科工程部任職。黃太形容丈夫為人顧家，而且非常愛錫兩名分別5歲及7歲的女兒，事發時外出替家人購物，豈料從此陰陽相隔。初時她不敢向女兒透露丈夫的死訊，但女兒不停問：「爸爸去咗邊」，她只能用較婉轉的方式回答：「淨係可以講爸爸去咗好遠嘅地方，上天堂準備定啲嘢畀我哋」。

夜深時，她不時會想起與丈夫的一點一滴，只好翻看手機內的合照，睹物思人，「每一日都諗起爸爸（丈夫），同埋日日都唔知自己做緊咩，行屍走肉咁，有時會同囡囡睇下啲相，同佢哋講掛住爸爸就望住天空，同爸爸傾偈」，言談間黃太再次想起丈夫，不禁流下眼淚，令人心酸。

自從意外發生後，任職文員的黃太只能辭職擔起重任，照顧一對女兒及年約70歲的奶奶，「壓力都大，始終冇咗爸爸份收入都唔知點算，又要睇住兩個細，屋企仲有老人家要照顧，暫時都係見步行步」，現時她只能靠朋友接濟，等事情回復正常後，再作決定，而丈夫的後事亦處理得七七八八，稍後會進行出殯儀式。

對於該名懷疑撞斃丈夫阿雄的42歲寶馬司機，她初時感到非常氣憤，但其後兩度表示「怪責都冇咩意思，爸爸（丈夫）都返唔到嚟」，只希望有一個公平的審訊，又呼籲所有司機駕車要小心，避免發生意外，釀成悲劇。

事發於本月11日，一輛寶馬電動車在沙田鄉事會路十字路口猛撞電單車後翻側路中，鐵騎士磨地衝行數米，撞向鄰線的士車身後，倒在的士旁邊，血流披面昏迷送院，經搶救後不治，42歲姓林寶馬司機事後以涉嫌危險駕駛導致他人死亡，案件交新界南總區交通部特別調查隊跟進。

https://hk.appledaily.com/breaking/20201128/AFDBXZ7XAZBGROJNWVIUCCCVN4/