|
趁有時間講吓間學校先
首先形容下我嘅宿舍係咩格局, 佢係一條長方形走廊, 走廊兩邊都有房, 中間就係𨋢位（好大塊落地玻璃但啲窗開唔到）同埋洗手間+沖涼房, 其中一邊走廊仲有個pantry , 每層樓嘅格局都一樣除咗1樓同2樓, 因為一樓同二樓係連住校舍, 中間有條走廊直接行到去課室嗰邊, 你當高空望落去係一個U字形, 左邊矮啲得兩層,右邊高啲有十層, 咁個兩棟建築物中間係一個細花園, 平時放break我哋會出去嗰度食煙, 夜晚會鎖門出唔到去嗰度, 而且校舍嗰半邊夜晚會熄曬燈
我哋平時冇嘢做夜晚有時會落去大堂度吹水(食煙方便), 即係個U字嘅底部左下角, 直望就係一排教室嘅走廊, 基本上你唔會睇得好清楚條走廊, 啲光全部都係靠個花園嗰度照入嚟
呢件事係發生喺S&M事件之前
咁有一晚出面好大雪, 我哋就落咗下面大堂吹水, 大堂本身放咗四張長梳化好似一個正方形咁, 我哋嗰晚三條友就一人一張, 留返右手邊嗰張空咗, 我坐個位係直望住校舍嗰條走廊而朋友a女同b男就坐喺我左手邊同埋對面嘅梳化, 咁我時前坐位當然都好自然係望向前方走廊嗰邊, 吹左陣水差唔多到十二點幾突然見到走廊嗰邊好似有個人影喺度揮手, 因為嗰晚出面落大雪反曬光所以條走廊都比較清晰,咁我就諗係咪有個同學漏咗嘢喺locker夜媽媽落嚟摷嘢就望多兩眼睇下係邊個, 突然我左手邊a女突然同我講咗句你咪咁多事啦唔好再望(a女自稱有陰陽眼), 咁我下意識就答咗佢識得㗎邊個嚟㗎？跟住佢就話唔識、唔想知、唔想理, 總之你唔好再望啦
咁你知人係八卦㗎啦, 你越叫我唔好我就更加想望多兩眼,而且我坐嗰個位真係好難唔望嗰個方向, 過多陣突然間條走廊燈閃咗一下好明顯清晰見到嗰到係一個人都冇, 盞燈閃完之後又見到有人企咗喺嗰個位同我哋揮手, 咁我都知今次奶嘢呀就唔敢再望, 跟住a女就喺隔離笑話向左走向右走咗你㗎啦, 抵向左走向右走死
咁每隔一陣條走廊燈就閃一下, 而向我哋揮手嗰個人影開始越企越近, 到個人影去到差唔多行到大堂同走廊個交界位嗰陣我先見到原來佢唔係喺度揮手係個上半身左右左右咁樣喺到搖, 但下半身企到好直完全冇喐過, a女突然之間好大力咁拍落張茶几度, 大聲話出去食煙, 之後就冇理我同b男直接行出學校門口, 咁我哋自然跟埋出到, 到出咗學校門口之後a女發曬爛曬咁HiSeven出我八卦, 話人哋好地地傻的嗎勁企喺嗰度自己一個"發下發下" , 我做乜要係咁啤住佢搞到而家引咗佢過嚟
咁我都好向左走向右走無奈,我真八卦d啫, 咁我問佢而家點呀,佢話拿拿聲食完支煙返上房瞓啦,唔好再喺大堂附近逗留, 咁我哋食完煙就即刻衝返學校轉右入返嚟宿舍嗰邊搭𨋢唔敢再望左手邊個大堂. 咁部𨋢門係對住舍監個office, 佢office全部都係玻璃, 佢入面又熄咗燈所以我哋搭一個陣係反映到我哋自己同埋大堂, 喺部𨋢度門閂緊嗰陣a女Hi咗一聲, 因為我同佢經過嗰office塊玻璃反影,見到嗰件嘢企咗喺宿舍入口嗰個位左右發下發下發下發下...
|
