傳咗好耐，連國會都要求皮褸黃交代，今次唔認都唔得。上星期仲話係正常客戶往來，今日就親自承認婚外情。
11月8號星期日，皮褸黃向Nvidia員工發信，承認自己對太太不忠，傷害咗太太同仔女，話自己冇任何藉口，並為自己嘅行為道歉。佢亦承認辜負咗員工、董事會同股東嘅信任，承諾會努力重新贏返信任。
同一日，Nvidia董事會正式宣布成立獨立調查委員會，由獨立董事同外聘律師調查皮褸黃有冇成為外國情報行動嘅目標。
驚大家唔知上個月（或之前）發生咩事，簡單講解下。
上個月尾《New York Times》首先報道，美國情報機構懷疑一名叫Alice Huang嘅中國女商人，被中國國家安全部招募，接近皮褸黃去收集情報，甚至可能試圖影響美國對中國出口AI晶片嘅政策。Alice Huang曾經係新加坡科技公司Megaspeed嘅高層，而呢間公司本身就係Nvidia嘅客，購買AI晶片，再提供運算服務。呢間公司亦因為涉嫌協助中國攞到受美國出口限制嘅晶片被調查。不過Nvidia之前話經內部調查，冇發現違規嘅證據。
當時Nvidia嘅解釋係，皮褸黃每年會見幾千個客嘅高層，同呢個女人只係正常商業關係，冇乜特別。
到11月6號，《Financial Times》再爆，話美國官員今年初期準備咗份情報備忘錄，提到皮褸黃同Alice Huang曾經有戀愛關係。
然後11月8號，又返到《New York Times》接力，原來呢件事早响今年春天已經驚動美國政府最高層，Marco Rubio曾經參與過一份高度機密備忘錄，警告Donald Trump政府高層，皮褸黃可能受到中國情報機構滲透。不過就唔知《Financial Times》講嗰份，係咪就係Rubio指示嗰份喇。
即係話，當外面收到Nvidia嘅解釋係「正常商業」來往，但美國政府高層其實已經睇到另一面，關心咗幾個月。
而家黃仁勳親自承認婚外情，雖然佢响員工信冇直接講出女方姓名，但好多傳媒去聯想到同Alice Huang有關。
Nvidia董事會依家話冇理由相信美國國家安全或者公司機密受到損害，亦繼續支持皮褸黃做CEO。中國方面緊係否認，新加坡政府亦表示警方正調查Megaspeed，但冇因為Alice Huang涉嫌從事中國情報活動而調查佢本人。
不過美國國會就唔係咁睇，眾議院外交、中國問題同情報三個委員會主席响11月4號已經聯署，要求皮褸黃响11月18日到國會接受閉門簡報，交代同Alice Huang嘅往來，同埋Nvidia如何防範外國情報機構滲透。
以前係軍事將領、政府高官，今日可能係科技公司老闆。時代變咗，目標變咗，人性就冇乜變。
對一位身處全球AI科技頂端嘅男人黎講，今次至少證明咗一件事，AI可以先進到改變世界，但（男）人响物理同肉體上，可能仍然有漏洞。臨老入花叢係好容易整污穢㗎。
https://www.facebook.com/photo/?fbid=1725557835599217&set=a.288066362681712
