各位巴絲打，平時鬧人「去食屎啦」，點諗到今時今日喺醫學界，「食屎」隨時係救命良藥？！講緊嘅係近年全球醫學界狂推嘅「腸道微生態移植」（俗稱便便移植 FMT）！
平時大家腸胃差、成日肚瀉血便，好多時係因為腸道菌群失衡。日本順天堂大學腸內細菌療法研究中心負責人石川大教授，近日受訪大爆最新醫學進展，睇完真係大開眼界！
傳統便便移植要點做？醫生要先篩選極度健康嘅「黃金捐贈者」，將健康便便提煉出優質腸道菌溶液，再幫病人照腸鏡直接注入大腸。順天堂大學早前喺全國4間醫院為難治之症「潰瘍性結腸炎」患者做臨床治療，結果緩解率高達 45.9%，成效相當顯著，目前正全力爭取納入日本健保！
但照腸鏡始終辛苦，最新突破係咩？就係將健康腸道菌「膠囊化」，直接變做口服藥丸！美日跨國臨床試驗已經正式啟動，日本今年8月已經有第一位患者完成口服投藥。以後病人唔洗再捱瀉藥照腸鏡，吞幾粒特製膠囊就有機會重整腸道生態，認真劃時代！
更震撼嘅係，腸道菌群嘅影響遠超大家想像：
1. 助攻癌症免疫治療：
日本國立癌症研究中心同順天堂大學合作發現，部分對 Opdivo 等免疫檢查點抑制劑反應差嘅癌症病人，腸道菌群多樣性普遍偏低。透過移植健康腸道菌，有望激活免疫系統，令昂貴抗癌藥發揮真正威力！
2. 柏金遜症新希望：
醫學界發現柏金遜症嘅異常蛋白，好可能最先喺腸道沉積再經神經影響大腦。研究團隊正著手探討腸道菌移植能否改善神經退化症狀，「腸腦軸」真係唔係講笑。
教授真心溫馨提示：
唔少巴絲可能會諗：「我平時飲多兩樽益力多、食多幾包益生菌得唔得？」教授直言，嚴重疾病患者嘅菌群結構，單靠日常飲食好難有翻天覆地嘅逆轉；但健康人士日常依然要均衡飲食、少食刺激性食物去保護好自己嘅腸道菌。
另外，呢項技術目前仲處於臨床研究階段，大家千祈唔好盲目幫襯出面未經官方審批嘅天價私家診所，安全同衞生質素先係最重要！
各位打工仔OT狗，今日起真係要善待你個腸胃，話唔定你肚入面嗰幾十兆隻益菌，先係你一生最珍貴嘅資產呀！
#腸道微生態 #日本醫療 #潰瘍性結腸炎 #抗癌新希望 #HKGoldenHealth
