原廠話：冇框，張防火證書即刻作廢。咁全香港有幾多部𨋢張證書係作廢緊？
我係做咗30年升降機嘅𨋢佬。臺日電梯338幢冇門框件事，我唔係幫邊個講嘢，但行內人都知，呢個唔係臺日獨有嘅做法。
過去10幾年，不管係日X、奧x斯呢啲十大，定係哲X、時X、聯X呢啲細公司，換𨋢淨換門板、保留舊框做修飾面，係好常見嘅現場處理。點解今日得一間被公開點名？
好多人唔知，包括最近喺Youtube講足兩個半鐘嘅潘xx，佢淨係揸住本條例書講。但做過先知：防火門、門框、防煙扣，喺原廠係一整套去燒先攞到防火報告嘅。廠家講到明，你換咗其中一件，唔用佢原廠成套，佢唔會承認張報告。
咁即係點？如果要100%跟足字面，係咪全香港由2016年到而家，所有淨換門板嘅𨋢，都要拆返晒？
最令行內人嬲嘅係呢樣：呢個做法，機電署唔係唔知。每一部𨋢換完都要經工程師簽、交文件、機電署出「准用證」先用到。呢10年幾千部咁樣換，張准用證係邊個批嘅？
如果真係關乎生死，點解早10年唔提？市民好難唔會諗，係咪將成個行業10年嘅歷史遺留問題，變成得一間公司去承擔？咁樣算唔算係搵人交代？
https://www.threads.com/@lifeman_30year/post/DesBydZEuXJ
