最近一宗懷疑狗咬死人事件發生喺元朗壆圍南路，元朗區議員梁明堅連日喺facebook就此發文，前日提出6個建議，包括當局應採取措施防止同類事件發生，配圖係佢企喺草叢遠望，再加上好多跑友常用嘅運動紀錄，顯示佢用咗70分鐘20秒完成21.45公里，引嚟網民熱烈討論同質疑，有人話呢個時間足以加入國家隊。
梁明堅不時喺facebook分享跑步嘅相，而今次嘅21.45公里大概係半馬距離，但佢就無講明係咪跑步時間。根據田總紀錄，香港半馬紀錄保持者林穎璋嘅時間約66分鐘，如果呢個係梁明堅嘅跑步時間，足以躋身全港第八名。
有網民留言形容梁係「畀議員身分耽誤嘅運動員」，亦有人話「港隊都唔夠你個呀伯嚟」。不過都有唔少網民提出質疑，話無論跑步定踩單車，個時間都係「神級」，「作大都要有個譜」，有網民就認為純粹「個Apps壞咗啫」。
面對網民質疑，年過四十嘅梁明堅噚日上載四徑（全長298公里）圖片，配文「下一個目標」。
