57歲姚正菁時隔30多年，獲新世界娛樂老闆Sam哥賞識，因緣際會簽約復出。

姚正菁去年告別異地戀回復單身：「我仲有市場㗎，同年齡拍埋一齊唔輸蝕。」追問揀偶條件要不要以初戀情人郭富城為藍本？她強調冇特定標準：「太『鮮肉』對象唔得，最多下限細10年，主播前度同我都有年齡差別。」

姚正菁初戀只係愛情小說
對於被標籤「郭富城初戀女友」，姚正菁因而被網民鬧「抽水」：「佢哋話『我有一班鐵粉，唔使消費城城』，我親回『人哋提起我唔避忌回應啫。』」

姚正菁又罕談和城城的絕密初戀片段：「因為當年佢係舞者，我係選美，成日一齊玩，啱key咪拍拖。正因相識於微時，大家會簡單一啲，所以一齊好純真，加上兩個人工又唔係好高，會慳住使，可能一碗雲吞麵兩份食，我哋會選擇唔坐車拍拖行返去。」問到初戀是否最難忘？她竟答：「呢啲只係愛情小說，我話你知，我嘅初戀係最容易忘記嘅，因為隔得太耐，中間經歷過咁多樣嘢，你仲點會去留戀細細個時拍拖嘅嘢呢？如果佢唔係呢一行嘅人，我可能都唔會記得喇。」

至於分手真相，是否城城在台灣當紅上位後成為兩人分開導火線？姚正菁含糊道：「冇話邊個飛邊個，記得佢台灣拍完廣告後返港變咗大忙人，但當時拍拖係要搵個男朋友，係想有人陪我玩，睇戲、行街呀，而唔係要佢有幾威嘛，對方忙到根本冇時間，咁咪自然會分開囉，正如而家流行，成年人最好嘅分開方法，唔使講再見，大家唔聯繫就係叫默認分開，當年也如是。（有冇後悔失咗個天王男友？）唔會囉，我之後經歷嘅嘢畀咗我咁多人生經驗。」

姚正菁對郭富城冇愛冇恨
另一個多年誤解，指她分手後受刺激而拍三級片，姚正菁首度開腔澄清：「根本唔關事，唔合邏輯！當年風氣流行拍三級片，受刺激嘅話最多去嫁人。」她又否認想藉此拉近同城城事業距離：「我冇嗰種鬥心，你紅你嘅事，我做自己嘢。」提到城城曾暗示前女友出軌，她認真道：「我聽過呢個講法，但佢冇指名道姓，況且唔係我，我一腳搭幾船應付唔到，好費神，我係專一嘅人。」講到今日對城城感覺？她猶豫一下：「我唔會憎呢個人，冇愛冇恨，坦白講而家睇返佢啲嘢完全冇感覺，上次朋友有飛睇佢澳門騷，睇咗一半跟朋友走咗，我好似一般觀眾咁好casual睇騷，唯一認同佢喺舞台上面依然發光。」


來源網址 : 姚正菁首談初戀浪漫-激罕揭郭富城分手真相復出遭前輩白鴿眼丨獨家 | 星島頭條
https://www.stheadline.com/film-drama/3604110/