提早提取的理由
前陣子，我因為公司流失率高、留唔到人而極之頭痛。
本著虛心求教嘅心態，我約咗一位做過億生意 Level 嘅前輩飲茶。
我原先以為，呢位成功人士實會同我講咩「企業文化」或者「股權激勵」。
點知，前輩聽完我嘅訴求，啜咗啖茶，淡淡然咁塞咗四個字畀我：
「等佢唔夠錢洗。」
「吓？」我堂皇咁話：「唔夠錢洗？低人工人哋咪走得仲快？！」
前輩望住我，眼神帶點看透世事嘅奸詐：
「錯喇。唔係叫你畀低人工，相反，你要畀一份唔錯嘅人工，但同時，你要想盡辦法叫佢洗晒佢。人一旦冇晒儲蓄，轉工嘅風險成本太高，佢自然就會乖乖留喺度搏殺。」
那一刻，我好似聽緊佛偈，又好似聽緊犯罪心理學。
前輩仲好大方咁同我分享佢嘅實戰招數：
針對廿幾歲嘅後生仔： 佢會瘋狂鼓勵去旅行，最重要是及時行樂，仲發旅行 Bonus。但有個魔鬼細節——個 Bonus 要三個人一齊去先可以攞足。一個人去可以窮遊，但三個人一齊去，大家實會互相拉高消費。結果公司補貼佢三千，佢自己起碼洗多三萬，變相「精緻窮」。
