如果要從玄學角度去講呢樣現象呢, 首先我就想講下一般冇運行嘅時候, 人與人之間嘅一啲互動關係
正所謂物以類聚, 行衰運嘅人, 自然身邊互動最多嘅通常都係差唔多, 冇乜運行
就以我自己親身經歷為例, 想當年行緊一個制殺太過嘅運, 基本上就打份份工都做唔長, 最記得當年同啲 friend 出去食飯, 一枱八九個人, 得兩個有返緊工, 仲要係散工, 其餘全部都失業
如果用玄學角度去解又點解呢, 好簡單, 排個八字嚟睇下先
癸辛癸丁 甲 丙
巳亥巳酉 寅 午
日主係辛金, 薪金嘅自己友, 佢啲朋友, 好兄弟, 會用一個乜嘢字嚟到代表呢? 五行十神系統入面朋友就係比肩, 簡單嚟講, 當呢個人係你朋友, 自己友, 以呢個日主辛金嘅人嘅角度嚟睇, 你就會係同佢相同五行嘅字代表, 如果局入面有呢隻字, 你就直接用呢隻字, 即係酉金, 假如局入面冇呢隻字呢? 我哋可以假設你就係同日主相同嘅同一隻字
結果發生咩事呢? 傻嘅都知, 呢個八字嘅主人係冇運行㗎啦, 如果從八字結構去睇, 你代入咗去個酉字, 講得白啲就係面臨返相同嘅結構問題啦, 即係話, 同呢個八字嘅主人互動越多, 佢越係真心覺得你係自己友, 咁尅應嘅現象就會越大
呢個亦都係點解, 無論你講玄學, 定係講科學, 你都係要識返啲叻人, 盡量黐住啲叻人, 多啲同佢哋接觸交流, 自然就會有改善, 完全相同道理
