SpaceX 呢隻嘢，估值衝到1.75萬億美元，但係就係唔畀香港人玩。呢單嘢真係直接衝擊香港作為國際金融中心嘅地位。究竟係美國政府喺度用國家安全做藉口圍堵香港，定係華爾街嗰班投行自己搞鬼，唔想畀香港資金分一杯羹？香港政府聲都唔出，擺明幫CIA 做情報收集嘅AI 股都喺香港炒到，點解而家唔得？真係講唔通啊老友！香港而家做緊金融中心，點解連參與全球最勁嘅太空項目嘅機會都冇？呢個已經唔係單純商業問題，而係直接打臉香港嘅國際地位。

其實香港人抽唔到SpaceX，未知係禍定係福。塞翁失馬，焉知非福。因為SpaceX 越睇越似一個宇宙級雞棚。馬斯克將自己嘅個人聲譽同SpaceX 綁晒一齊，估值高到離譜，但係絕大部分業務都係蝕緊錢。火箭發射、AI、去火星… 去到火星傳乜嘢訊息返嚟？真係值得咁多錢？而家市場最鍾意聽故事，但故事聽得多，現金流就冇咗。香港投資者平時最憎雞棚，點解今次反而想參與？可能係因為「太空」兩個字夠響，夠有面子。

最穩陣賺錢嘅就係Starlink 星鏈。點解成功？因為佢喺太空放衛星，唔使交地租，我曹老闆中環租車位都萬幾蚊，馬斯克放到成個太空連一蚊都唔使俾。呢個優勢係獨一無二，不過第日立太空法就好難講。但係而家Amazon、中國公司都搞緊低軌道衛星，競爭已經開始。就算Starlink 繼續賺到錢，呢個估值都係高估咗好多。馬斯克自己都知，呢個優勢遲早會畀人追上，到時先至知邊個先係真雞棚。

X（以前叫 Twitter）就更加慘。廣告收入同對手差天共地，數據中心租出去都唔夠。xAi 大戰燒錢燒到無命，人工數據中心租務自己都頂唔順。除咗Musk 出名大膽放肆，係Glork 玩咸濕嘢，呢啲「優勢」遲早畀道德派要立法規管到冇晒。

Musk 又話要起超級晶片工廠。但係人哋SK 海力士已經投資十幾廿年，專利散熱技術全球No.1。而家先開始搞，有排追，或者要俾超級多嘅專利費用。更加誇張係而家AI 燒Token 嘅電費開支嚇死人，Uber 已經話四個月就洗晒全年預算。究竟呢啲超級智能行落去，係咪真係需要咁多晶片？

不過講返火箭技術，SpaceX 確實有獨家之處。以前太空科技係政府項目，燒納稅人嘅錢，SpaceX 先至將重用火箭做到商業化，成本大減。中國航天而家都開始商業化，未來競爭會更加激烈。SpaceX 當然可以賺到錢，但係絕對唔係而家呢個1.75萬億嘅估值咁誇張。買唔買？自己睇路啦。

總結一句：呢次香港被「唔受玩」，可能係上天保佑。宇宙級雞棚，遠離啲好過。香港投資者，定定心做返自己熟悉嘅嘢，唔好chase 呢啲太空夢。夢想係好，但係現金流先係王道，科技夢爆破，香港人唔知經歷過幾多次。

Be your own boss, keep your mind sharp.
更多資訊，盡在BossMind
#BossMind ＃財經 ＃經濟 #房地產 ＃財商 ＃樓市講座 ＃買樓 ＃新盤 ＃買樓上車 ＃買樓收租 ＃spacex ＃曹老闆

https://www.facebook.com/share/p/18mJFcU41c/

唔知曲定直，但覺得starlink會面對競爭真係傻的嗎，低軌道空間有限，每多一粒starlink衛星，其他公司就少一粒空間，依家starlink仲要最低成本不斷射緊上去霸位，覺得amazon同大陸可以捲到starlink真係傻的嗎