边有錢食
有冇人同我一樣，成副身家隊落Elon Musk度？
我真係好後悔，睇住佢既股價日又跌夜又跌，依家每日返工都好似行屍走肉咁，望住個天，除咗絕望就係絕望。
故事要由三年前講起。當年SpaceX嘅Starship試飛好似食生菜咁，Elon Musk又日日喺社交平台畫大餅，話2026年一定要送人類上火星。我睇住啲火箭垂直起飛再垂直降落嘅畫面，成個人熱血到沸騰，直情覺得自己見證緊人類歷史。
當時我諗：「今次Hi Hi啦，財富密碼呀！Tesla爆升嗰陣我仲讀緊書錯過咗，今次SpaceX仲唔到我發達？」
為咗一圓我嘅「火星原居民夢」，前個禮拜space x終於上市，我瞞住老母，將原本準備用嚟買將軍澳兩房首期嘅200萬港幣，透過各種海外私募渠道、信託同二手市場，高位接咗SpaceX嘅股份。
入完貨嗰陣，我每日返工塊面都帶住一抹神秘而高傲嘅微笑。經理Hi我，我心諗：「Hi啦Hi啦，你繼續Hi啦，過多幾年我坐Starship去火星開荒做大地主，你條老屎忽就繼續喺中環迫地鐵啦！」
結果？人哋話「火箭科學」係最頂尖嘅科技，我依家先切身處地明白，咩叫「火箭式燒錢」。
Starship變咗煙花： 每次私人融資估值好似升咗，但想套現就難過登天。每當睇直播見到火箭在線爆炸，我個心就跟住一齊碎。
Musk哥又改口風： 前幾日佢又喺X度出Po，輕描淡寫咁話因為技術同監管問題，載人火星計劃要延遲到2030年之後。
我當堂嚇到標冷汗。我啲資金鎖死晒喺私募市場，完全冇流通量。想折讓放返出去？根本冇人肯接。人哋買大路美股個個賺到笑哈哈，換車嘅換車、買樓嘅買樓；而我，就將真金白銀換成咗一堆「星際期票」。
琴日食飯嗰陣，我老母又開口問我：
「仔啊，你個首期草成點啊？最近樓市好似回回哋，睇中咗康城未啊？夠唔夠錢？阿媽阿爸借多幾十萬畀你？」
我夾住舊叉燒，望住個飯碗，喉嚨好似卡住咗咁，一粒聲都出唔到。
我點樣同佢講，佢個乖仔將原本可以安居樂業嘅200萬首期，變咗做德州發射場上面嘅一舊不銹鋼廢鐵？我點同佢講，我原本以為自己係「未來星際開拓者」，依家連放假落街食餐飯都要諗過度過？
依家每逢放工，夜晚抬頭望住個夜空，見到夜幕中隱隱約約嘅星光，我眼角都會有淚光。
Musk哥，我認輸喇。我唔求去火星，我亦都唔想做咩星際公民。你可唔可以退返個首期畀我，等我喺地球買返層樓，安安分分做隻房奴，得唔得？
