至尊足球會班主王至尊(Jim)指來季預計以「至尊沙田」名義出戰，並爭取以沙田運動場作主場：「程序上係用沙田體育會會籍上港超，『至尊』就當冠名贊助，雖然本身想叫『沙田至尊』，但分別唔大，嚟緊要球員辛苦啲，希望去晒沙田區學校做宣傳，長遠鼓勵喺呢區鍾意踢波嘅青少年，以效力至尊為目標；我哋都爭取用沙田運動場做主場，加入娛樂元素，如果翻新唔切，會向足總申請踢晒作客比賽先。」
Jim又透露已在馬文、朴叡俊及馬斯奧以外，再於前、中、後3線各簽1名外援，球會亦將發布影片公布新球員：「我畀咗300至400條片畀『均宜』揀，新外援冇嚟過香港，水平至少去到泰國T2同日本J2，一旦唔啱用，大約3個月後換得，盡力確保球隊有一定競爭力，而早前已自行官宣加盟嘅『羅梓』（羅梓駿）會做隊長，藉此傳遞訊息，我哋主張用勤力、敬業嘅球員。」
至於「均宜」就指下季大部份成員，來自至尊及沙田的甲組原有人腳，盼為港隊培養新血：「始終球員為呢個升班資格付出好多，球會想畀機會佢哋挑戰頂級聯賽，
『文輝』（陳文輝）同『嘉緯』（林嘉緯）會以助教兼球員身份幫手，『學曦』（林學曦）就以球員身份留隊，希望用多啲本地球員，目標過多3年，全隊只需要用兩個外援，幫華人入港隊。」
