唔係講笑，今日返回地球進入大氣層果幾分鐘先係最危險嘅階段。
點解咁講呢？首先要回顧下三年幾前於2022年11月發射嘅Artemis I無人測試任務，呢次任務其實比依家嘅Artemis II飛得更遠，當然因為冇載人，所以自由度更高，當時飛到去離地268,563英哩，比Artemis II嘅252,756英哩遠多成萬幾哩。任務時長25日，亦比今日嘅Artemis 二號耐成倍有多，工程團隊將飛船內每項系統壓力測試到爆燈，但仍然全部正常，所以大家當時都非常歡欣鼓舞，因為一號嘅無人測試當然係為二號嘅載人飛行做準備，咁睇到一號一切正常，只要能夠順利降落，二號真正載人飛船嘅發射就指日可待。
但衰就衰在一號降落時，NASA為咗測試一種新嘅重返大氣層（Reentry）切入角度，專登唔用以往做慣做熟嘅直接進入（Direct Entry）角度，而選用一種全新嘅彈跳式進入（Skip Entry）。比起由阿波羅時代一直用到今日嘅直接進入，彈跳式嘅特點係，佢從太空進入大氣層時唔係一嘢隊入去然後就降落，而係先用一個好斜嘅角度切入少少，然後利用飛船嘅高速度彈回太空，然後又跌返落嚟，不斷重覆呢個動作，最終達到降速嘅效果，需時同操控難度都比以往嘅直接進入難好多。你可以想像下細個時去河邊玩片石仔，就係類似嘅原理，將一舊石就咁掟入條河，佢自然即刻沉，但如果你斜斜哋咁Fing舊石出去，佢就會因為自身速度及河水面嘅密度而於水面上彈幾下先沉，咁將石頭換成飛船，而河面換成大氣層就係咁上下道理。
下圖為直接進入模式同彈跳進入模式嘅分別
