今次真係皇上英明，細仔同新抱唔洗旨意再有任何幻想，高招！

英國皇室最厲害嘅地方，就係可以成篇文都好有禮貌，句句都充滿尊重，但睇完之後就發現其實將後門完全封死，仲要滴水不漏。

上個月，退役皇室Harry全家忽然決定搬返英國，傳媒不停討論佢地依家算咩身份？會唔會重新參與皇室工作？會唔會恢復 HRH？有無機會再用皇室身份做慈善活動？ King Charles今次嘅徹底割蓆方式，可以話係完美示範。

首先，皇室今次選擇嘅唔係英皇親自出聲明，而係由Lord Chamberlain Lord Benyon，亦即Royal Household（皇室內庭，好似古時嘅內務府）嘅最高主管之一，跟英皇指示向政府同軍方之類嘅相關人士官式傳話。

開頭已經係：”we have received a number of requests for guidance”，呢一下就已經係表明係公事，唔係家事，仲要係回應制度內嘅人。 第一句就幫所有人回帶，順便提醒個不肖子。”It is well known”，2020年佢地兩個已經退出代表皇室嘅工作，亦唔再係working Members of the Royal Family。即係：「大家要有記性，唔好再扮失憶。」 跟住就係最英式含蓄，棉裡針嘅部分。

文中話兩個人因為呢個身份而得到更多”personal latitude”（私人空間），包括財政獨立同佢地想要嘅私隱，而皇上同皇室會繼續尊重佢地嘅選擇（”fully respected”）。 句句都係理解同尊重，實際意思係「你地當年要獨立同私隱，覺得有能力自己搵錢吖嗎？我地依家仍然尊重你地嘅決定，唔該繼續享受私人身份啦。」

然後就拉閘上鎖，消滅所有無謂幻想，"there is no change"，HRH呢個稱呼仍然停用（”in abeyance”），亦唔會用（”are not used”）。即係2020年嗰條紅線原封不動，返咗英國都唔代表有重新開機嘅可能。 慈善工作就更清楚，係兩個人自己嘅私人事務”personal matter”，以個人身份”private capacity”進行。

到最後嗰句先係用埋玻璃膠封到滴水不漏，「你地仍然係王子同王妃，但响慈善同商業活動當中，係要用平民身份（同皇室完全無關）。」（ “their position is akin to private citizens with commercial and charitable interests。）

WOW！去到呢度仲未完呀！

最後就係交代聯絡方式，所有行政同書信直接搵佢地自己嘅私人辦公室，而且講明會繼續同內務府分開，涉及官方禮儀或者公費嘅問題要先問白金漢宮，保安問題就自己搵警察。連櫃枱都幫你分埋，邊樣係皇室，邊樣係你自己，唔好搞錯。

完全唔需要勞氣，甚至連責備都無，只需要由大內總管按皇上指示，客客氣氣將no change再寫一次，就已經將所有企圖半推半就嘅幻想完全消滅。

最妙嘅係，唔係爸爸同個仔講家事，而係揾秘書大內總管正式通知所有人，「唔係同你講，只係通知大家啫」， 因為內政部本來就準備檢討對呢家人嘅保安安排。

皇上今次真係英明。
https://www.facebook.com/share/1BnzezGxWy/