「點解會咁？」我好緊張咁問，

Yoyo：「我有問過佢要唔要我陪佢，佢話佢可以我先比佢自己一個去，我諗，可能係見完阿爸佢有……小小心情唔好。」

Yoyo特登壓低聲線，為左唔想比廚房既阿媽聽到。

以娜：「薛可正，你入去睇下可勇啦。」

「嗯。」

「咯咯咯。」

可勇：「邊個？」

我：「可勇，入唔入得黎？」

「入黎啦哥。」

我打開門，行入房，見到可勇坐左喺床邊望住我笑。

我：「點呀？行得喇喎，你得未？」

可勇：「阿哥你架車好似唔夠坐，不如我自己晏小小去。」

我：「點會唔夠？以娜坐前面，你兩公婆同阿媽坐後面，天佑手抱之嘛。」

可勇：「係喎，夠喎。」

我：「今日見到阿爸，係咪唔開心。」

「……………」

我：「對唔住可勇，今日阿哥應該陪你去。」

可勇：「冇用，如果你同我一齊去，只不過係兩個人一齊唔開心。」

我：「阿爸個樣……」

「佢根本唔係阿爸黎。」

我：「唔係阿爸？搞錯左？」

可勇：「冇，但好瘦，仲瘦過阿爸走果時，成個樣根本唔同哂，我望左好耐好耐先敢認定係阿爸黎。」

「你點望？」我知道我呢個問題有小小愚蠢，但我真係好竭力咁去幻想當時既情況，去同可勇分擔呢一種不快樂。

可勇：「我行到好近，好近，將整個人靠過去，但係…我好似只係見到一個阿爸既蠟像咁。」

可勇開始眼紅，而我內心亦好難過，薛可正，點解你會比自己細佬一個人去承受呢種不安？

「對唔住，可勇，對唔住。」我攬住可勇，不斷講對唔住，因為已經冇其他既彌補方法。

細個，阿爸同我地講，兄弟就好似你身體上任何一部份，如果有人用把刀，一刀斬落你隻手度，你唔會即刻成隻手掉低自己走左去。你會避開，你會用其他既物件擋住，你唔會比任何事物傷害到你隻手。

兄弟姊妹都係一樣，如果佢有危險，你應該係第一時出現，第一時間為佢解困，真正既親情應該用呢種心態去維繫，用呢種關係去將佢盛放。

細個我當故仔咁去聽，其實一直都係白費緊阿爸既心機。

「好喇，要去殯儀館架喇。」以娜喺房外面向我地提醒，我拍拍可勇，然後就一齊起身，去送阿爸最後一程。

兩點四十五分，我地到達殯儀館，行到去一早知道預訂左既靈堂，我放低隨身既物件，咁啱有一個職員，由後堂果度走出黎。

職員：「係咪主人家姓薛架？」

我：「係呀。」

職員：「個堂你地用得架喇，果邊有貯物室，呢邊就係後堂，係比先人訓覺既，送黎既花牌我地員工會安排架喇，如果排位上面想點做可以隨時同我地講。」

我：「唔該哂，係呀，我想問……我爸爸而家係唔係已經喺後堂果度？」

職員：「係呀，已經化好妝架喇，一係我帶你入去睇左先，如果有唔滿意我再搵化妝師執一執好嘛？」

「…好呀。但你等等。」

「好，冇問題。」

「媽，果位職員話阿爸已經化好妝，妳要唔要入去睇睇？」

阿媽：「好，我同你入去。」

我：「可勇，你得唔得？」

可勇：「得架喇哥我，點都會再見，阿爸都想我地一家人一齊去睇佢。」

Yoyo：「我都想望下阿爸。」

以娜：「天佑比我抱住，我唔入去睇喇。」

我：「咁妳去果邊坐住先，媽我地行喇。」

我地四個人跟住個職員，行到去後堂既門口，職員一打開門，我就聞到一陣好似蠟燭咁既味道，跟住我就見到一塊落地玻璃，我猶豫左一秒，然後拖住阿媽走入去。

行入去，我人生當中最震撼既一個場面走入我眼簾，我見到一塊好大既落地玻璃，後面，就係阿爸好安靜咁訓左喺度。因為阿爸仲未夠六十歲，長生店話唔需要著傳統壽衣，所以阿媽特別買左一套西裝比可勇今朝早帶阿爸過黎殯儀館既時侯，比阿爸做壽衣用。

阿媽：「阿來…嗚…」

「阿爸………」

職員：「幾位，不如過黎呢邊。」

職員帶住我地行近塊玻璃，然後由旁邊既一度門行入阿爸安眠既地方，職員行到去阿爸膊頭旁邊既位置，而阿媽就企喺阿爸腳邊，我呢一刻終於明白，可勇同我講既果份感覺到底係乜嘢。

我知道我眼前既係我阿爸，但我的確從自己見到既畫面入面搵唔到任何憑據，個感覺係好陌生，佢就好似係另一個人咁。

我望住可勇個樣，更加內疚，而Yoyo就一直忍住眼淚，默默咁企喺可勇身後面。

職員：「先人基本既妝都已經化好，因為黎到果時先人既眼唔係好合埋，咁我地打左針之後軟化返個皮膚都幫先人處理好呢個問題，仲有就係……」

職員一輪機關槍式既解釋，但我根本連小小都聽唔入耳，我望住阿爸，因為我好想認清楚，喺我面前既，真係我既父親。

解釋完，我地行返出靈堂，走出門口，我好自然咁望一望以娜，見到以娜都同時望住我，佢故意既笑一笑，就好似比一種無形既鼓勵我一樣。

換完白衫白褲，我同可勇拎住一堆麻布發呆。

可勇：「阿哥，點整架？」

我：「我唔知……阿爺果次我地都唔使。」

「等阿媽黎啦，轉身。」

可勇：「阿媽妳識咩？」

「生你地養到咁大都識呀，呢啲有幾難呀，轉身，嘩可勇原來你肥左咁多架？點呀縛得會唔會太實？」阿媽一邊幫可勇披上麻布，一邊幫佢整理好腰帶，可勇就係咁不停轉黎轉去。呢個感覺，就好似我同可勇細個，一齊返小學，一大朝早阿媽輪流幫我地整理校服咁。

我：「可勇真係肥左好多喎。」

Yoyo：「叫佢減，佢又話做人老豆，肥小小望落去老實啲喎。」

可勇：「邊有，小小之嘛。」

阿媽：「得喇，可正到你。」

「我自己得啦阿媽。」

阿媽：「黎啦，快快手整埋佢，一陣有親戚會黎，今晚你地唔好亂咁走，跪喺家屬席果度呀。」

「知喇。」

四點鐘，阿爸既喪禮算係正式開始，陸陸續續，親人、阿爸阿媽既朋友或者係以前友愛邨既鄰居都黎到拜祭阿爸。

阿媽情緒好平靜，到處咁仔細打點，無論係一個花牌定係一支白蠟燭，佢都要安排得一絲不苟。

阿媽講過，佢可以為阿爸做既嘢已經唔多。

喪禮既過程其實係好長，因為親友都相繼到齊，靈堂入面雖然大家都肅靜同悲傷，但其實靈堂外面既氣氛都會稍稍輕鬆小小，不竟喺其他人眼中，呢個只不過係一場普通既喪禮，冇必要時時刻刻都要傷心至呼天搶地。

以娜一直都坐喺我後面，好安靜咁抱住天佑。

六點半，創價學會既信眾都一齊黎到，然後十人一排，坐成五排咁一齊為阿爸唸經。

天佑可能太細個，聽到唸經既聲，好自然就喊起上黎。

以娜抱住佢走左出靈堂，阿媽見到，拍一拍我，示意叫我走出去幫一下以娜。

我行出去，見到以娜抱住天佑，好有耐性咁周圍行。

「點呀你，聽到唸經就喊咁冇用架。」以娜哄哄天佑，天佑好似懂事咁，冇再繼續喊。

「以娜。」

「薛可正，你走出黎做咩？」

我：「冇呀，出黎抖抖氣，唸緊經都唔會有人上香住。」

以娜：「你坐啦，我抱天佑得架喇。」

我：「妳唔辛苦咩？」

以娜：「呢個時間仲講咩辛苦，幫到來叔叔同阿姨幾多就幾多。」

我：「妳…真係唔睇下阿爸？」

以娜：「我見到你同可勇睇完個樣，都係決定唔睇，我想留個好印象。」

「………嗯。」

突然間，我同以娜都冇再交談，空氣開始凝結，周圍既氣氛比靈堂裡面既唸經聲襯托得格外古怪。

唔知點解，我會突然間問出呢個問題：

「喂，其實妳…會幾時返英國？」

「聽日，你信唔信？」以娜笑笑口咁答我，但我唔覺得呢個答案好笑。

「信，妳一向來去無踪。」我無奈，但可能已經習慣左，所以我既反應並冇以前咁大，雖然每次觸及呢個話題既時候個感覺都依然係咁痛。

「如果我真係聽日走，你會唔會好嬲我？」以娜繼續問，繼續抱住天佑，背靠住我咁問。

我深呼吸一口氣，然後慢慢，慢慢咁回答以娜：

「其實每一次比妳，或者係王力維同可勇鬧完我之後，我都會好似有一個角色走出黎問自己，妳地所講既嘢係啱定係錯。

每鬧我一次，我都會留低好多問號喺我心入面，有時我話明，但其實我未必係完全明，呢堆問題，一路愈儲愈多，每一次經歷一啲大事，就會將呢堆問號引爆一次，就好似妳去左英國、阿爸發現有癌症又或者係阿爸離開，每次引爆呢堆問題之後，我自己都發覺，其實，一路既問題都係來自我自己，我既性格、我既脾氣、我既面子，差唔多每一次，處理得最差既都係我。

就好似禽晚妳同我講我將個責任推左比可勇，當妳走果一刻，我都仲未完全感覺到妳講既嘢係完全正確，到左今朝早同頭先我見到可勇既表情，我先知我再一次做錯，我再一次低估其他人所受既傷害。

所以，由妳同我講妳爸爸有心臟病果一刻開始，我同自己講，如果妳真係選擇返英國，我應該係笑住咁送妳去機場。我知道妳呢個決定唔易，我亦都知道妳無論係對我，或者係阿爸阿媽都好，妳永遠都係用妳最真既感情。

阿爸離開令我真正咁知道，以信同世伯既病一定令妳既擔子好重，以前我唔識咁樣諗，但希望以後，我可以學識理解其他人既感受

我唔應該再關心果十蚊去左邊，我應該多謝妳比我既九十蚊。」

「痴線，都唔知你講緊咩…」以娜唔知幾時已經流到滿面眼淚，但因為雙手抱住天佑既關係，只可以由得眼淚不斷咁流。

跟住，以娜輕輕咁用個額頭貼住我既手臂，雙手依舊係抱實天佑，佢慢慢咁哼住音樂，等天佑可以慢慢入睡。

呢一個畫面，如果用另外一個距離咁睇，一定好靚。

呢一晚，大部份阿爸既朋友都黎到拜祭阿爸，唯獨是德叔，一直都冇出現到。阿媽話白事唔可以約人，所以我冇打電話比德叔，直至去到十點幾，我接到Gini既電話。

Gini：「正。」

「Gini，係咪德叔叫妳搵我？」平常我同Gini係冇聯絡，所以佢呢個時候打電話比我，我直覺係同德叔有關。

Gini：「係，佢喺大陸，今晚返唔到黎，佢打唔到電話，佢都係托朋友打比我，,叫我通知你。」

「哦，我知道喇。」

Gini：「正，今晚有嘢做，我都黎唔到，幫我問候一聲伯母。」

「好，有心喇。」

「咁我做嘢喇，你有時間搵我。」

「好，拜拜。」

直覺話比我知德叔依然係有佢要處理既問題，但同時我都知道佢所背負既問題，我係絕對幫唔到佢去解決。

呢一晚，我行左好多次入後堂睇阿爸，一路望，我一路覺得個感覺愈黎愈親切，我由果一個家族遺傳既鼻樑上面搵到阿爸熟悉既感覺，而最重要既，係我知道，過左今晚，我就永遠唔可以見到佢。

永遠，到底即係有幾遠？

夜晚，因為天佑既關係，可勇首先送Yoyo同天佑返屋企，最後就決定我同阿媽決定留底守夜。我離遠見到以娜喺大門既一邊休息，我行埋去，輕輕咁拍拍佢。

「以娜，都夜喇，我叫可勇送埋妳返去好冇？」

以娜：「唔使，今晚我留低陪來叔叔。」

我：「妳會好辛苦，返去訓一陣，聽朝再黎。」

以娜：「唔使，我今晚會留喺度。」

以娜斬釘截鐵既答我，然後自己又拉拉件外套，繼續休息。

果晚，我準備好一個可以比阿媽好好休息既地方，然後拎左幾件外套，坐喺以娜旁邊，慢慢咁訓著左。

我諗如果可以揀，冇人會願意喺殯儀館入面訓一晚，特別係當你依然仲生存喺呢個世界上。但我可以話比你地知，呢一晚，雖然我訓喺一個又凍又光，又有一種雪藏味既地方，但呢一晚係我人生入面最快樂既一晚，

因為阿爸同以娜仲喺我身邊。

而呢一晚，我訓到凌晨三點鐘，起左身之後就再訓唔返，突然我發現左一樣嘢，阿媽竟然唔見左。

我等左十五分鐘，都仲未見阿媽返黎，我有一種唔係太舒服既感覺，然後立即起身去搵下阿媽。

我起身想行出靈堂既時候，我突然感覺到後堂入面有一個人，有一個人企左喺度。

如果呢個情況係出現喺屋企，我會諗都唔諗就擰轉頭，但而家係出現喺殯儀館，我既感覺係有一種恐怖感。

最後我都係決定回頭睇睇，發現企喺後堂入面既，係阿媽。

阿媽望住安放阿爸既方向，一直喊，一直不停好細聲咁喊。

我走埋去，見到阿媽兩隻手都握住拳頭，個感覺係大力到好似想將個拳頭碎開咁，呢種表現我知道係過份抑壓，係抑鬱症既一種。

「媽。」我企喺後堂門口，細細聲咁叫左阿媽一聲。

阿媽冇應我，視線，依然係停留喺阿爸既方向。

「我同你阿爸結婚三十幾年，晚晚都訓同一張床，熱一齊熱，凍一齊凍，雖然你阿爸出事之後好少同我講嘢，但我一路都知佢冇哂自信好難受。

以前成日諗，比小小時間佢，由你地兩兄弟十幾歲，到你地而家差唔多三十歲，捱過冇錢既時間，又捱過你阿爸入醫院既時間，到可勇坐監我地又捱過左，到我終於捱到我老公有返自己，執返自己既世界，轉個頭佢就而家咁樣訓左喺我面前，聽日就拎去燒。

可正，你阿爸走左之後，我去睇過相，個師父問我想問乜，我問，師父呀，你幫我睇睇，我前世係唔係做左好多錯事，殺左好多人，點解今世要咁樣？

如果要報，可唔可以下世先報，今世，我想一家人齊齊整整………」

我攬住阿媽，我知道阿媽係一直都喊緊，但係佢冇喊出聲，佢攬住我，全個身體不停震，我望住阿爸，我怪阿爸點解會咁殘忍，點解會走得咁早、咁快。

「阿姨。」以娜原來已經醒左，企喺門口望住我地。

就係咁，我攬住生命中兩個最重要既女人，任佢地喺我懷中盡情咁抒發自己既傷痛，

以娜唔知係咪因為見到阿爸個樣，佢喊得比阿媽更加失控，一邊喊，一邊不停咁打我右手，不停講住同一句說話：

「薛可正，你知唔知一家人喺埋一齊真係好重要架？」

難過、複雜、深刻、沉澱既一晚。


第二日，一大早，好多打算送阿爸最後一程既親友都有出席，整個靈堂都坐滿哂人。

阿媽同以娜明顯就係好疲勞，特別係以娜，一早起身之後佢就出左去一陣，返黎之後一直發呆，有時望住我，唔知點解我覺得佢想逃避我既眼神。

因為我係長子，所以大殮之前會有幾個儀式需要我去幫阿爸做。

其中一個，就係洗面，我由一位師父帶領之下去到阿爸身前，我拎住一塊白毛巾，由師父一路既唸唸有詞之下，象徵式咁喺阿爸既面上揚左兩下，跟住師父帶我去到阿爸既腳尾，揭開左阿爸身上面既被比我睇。

師父：「先人準備入殮，而家你黎睇下陪葬既嘢齊唔齊？」

師父揭開張被，我見到阿爸隻腳，因為阿爸走果時已經好瘦，阿媽所買既西裝根本就唔啱身，形成阿爸著左上身之後，成套西裝就好似比幾支竹支撐住咁，我見到阿爸對腳，我覺得一個人，點解到離開呢個世界之前，都要比個病折磨到根本唔似一個正常人既體型，由之前一日阿爸喪禮到呢個時候，我第一次覺得崩潰，

成個感覺係毫無先兆，然後我行返出靈堂，期間果幾分鐘我係完全一片空白，個腦只係有阿爸對腳果個畫面。

幾分鐘後，師父再請我同阿媽、可勇入去，入到去時，阿爸已經放左入棺材，阿爸訓喺棺材，四周比陪葬品放到密密麻麻既樣，我覺得好唔自然，突然可勇跪低，向阿爸叩左三個頭。

阿媽：「可正，同可勇一齊叩。」

呢三個響頭，係我最後一次向阿爸既感恩。

檢查完成，我地三個人離開後堂，師父行返出黎，做一個接近完成喪禮既儀式 – 辭靈。

師父話，呢個儀式就好似係先人向呢個世界所有既事同所有既人辭別，生生世世，天人永隔。

我，以後都唔會再見到你。

聽到呢個儀式，我徹徹底底咁崩潰，之前覺得未來臨既，終於都活生生咁黎到我面前，我同阿爸要永別。

我接近失控咁大喊，以娜扶住我，可勇同阿媽都扶住我，由瞻仰遺容，到蓋棺，跟住師父們帶領既儀式，通通都喺我既哭聲之中經過。

我到五年後既今日都仲記得果一種痛。

阿爸既喪禮終於完成，火化之後既解穢酒，我地去左阿爸生前最鐘意既一間酒樓。

我一啖飯都食唔落，以娜坐喺我旁邊，一直都叫我盡量放鬆，唔好諗太多令自己太傷心。

以娜：「可正，食小小啦好嘛？」

我：「我食唔落。」

以娜：「可正，你唔食，我聽日就會走架喇。」

我：「我真係食唔到，我知妳想我開心，妳食啦。」

以娜：「你唔信我真係會走？」

「我信，我明。」果一刻，我完全唔明白以娜到底點解仲要咁強調呢一樣嘢。

以娜：「家人喺埋一齊真係好緊要，你記得照顧好阿姨。」

「我知道喇。」

食完呢餐飯，我送左以娜返屋企，我將車泊到去路邊，平常，以娜都係自己落車然後返上去。

以娜：「我隻腳有小小痛，你幫我拎埋個袋，陪我行返上去得嘛？」

「好。」

短短既二十秒路程，以娜望左我三次。

去到樓下，我忍唔住再問佢：

「係咪有事？妳今日咁怪？」

以娜：「冇事。」

我：「阿爸既事搞掂哂，聽日我放假，妳幾時走，我同妳玩多兩日，好嘛？」

以娜：「可正，記得我講既嘢……」

我：「我記得。」

以娜：「你想同我去邊玩？」

我：「妳想，去邊都得。」

以娜：「好，打比你。」

「好。」

「可正，拜拜。」

「拜拜，以娜。」

呢一句，係我最後同以娜講既說話。果一晚之後，我再冇見過以娜。

第二日，我起身再打電話比以娜，但佢既電話已經閂左。

今次同過往唔同，我地冇鬧交，以娜係突然之間咁消失，我怕佢有意外，所以不停咁打我地所識既朋友電話，我甚至去過佢姑姐既樓下等佢既出現，希望可以知道以娜去左邊。

足足三日時間，我不停咁搵，都係冇結果。

直到，三日後，我收到一封信。

係以娜寄比我既信。

「可正，寫呢封信既時候，係凌晨五點幾，天外面都開始有小小光，我坐喺靈堂入面，一路望住你訓覺，一路寫呢封信，唔知我一陣有冇時間寄走呢封信呢？

對唔住，由今次我知道來叔叔有事開始，我一返黎，其實就已經準備好返英國既時間，我試過好多次想同你講，但我真係搵唔到一個適當既時間，去話比你知，我真係需要走。

我知你睇到呢封信既時候，一定會好難受，請你信我，我比你更難受。

好似阿姨咁講，佢等到來叔叔搵返自己世界既時候，來叔叔就要離開。而我終於望見你改變既時候，偏偏就係我家人最需要我既時候。

我唔捨得你。

阿爸既病加上以信既醫療費用，以妮一個人喺英國根本應付唔到，我一定要返去盡返我做子女既責任，我知你會明白我。

阿爸同以信既病都係唔會好，所以我冇打算等佢地病好就返黎搵你呢個念頭，對你同對我甚至對佢地，都係好唔公平。

如果無條件比我揀既，我希望成為你既老婆，因為而家既薛可正真係太可愛。

可惜我諗左好多晚，都搵唔到一個栽種既環境比我同你既一段感情。

唔好搵我，你知道我既性格，我會依舊過得好好，我會依舊記得我地既事。

照顧好阿姨，佢既病唔係你想像中咁簡單，照顧好可勇，呢個細佬永遠都係咁愛你，到天佑大個左，你記得話比佢知佢細個曾經有個以娜姨姨抱住佢訓左一晚。

愛若難以放進手裡，何不將這雙手放進心裡。

我愛你，再見。

以娜 」

睇完封信，我知道以娜已經返左英國，唔知點解，一早預計到既結果，我依然係覺得好痛好痛，心口就好似比一舊大石壓住咁透唔到氣。

往後既日子，我同行屍走肉係冇分別，

一個月後，我由屋企既書枱入面搵返一個公文袋出黎，走到去銀行，將裡面既一萬蚊英鎊匯左去英國既一個戶口。

行出銀行，我望住個天：

「張以娜，我又自把自為喇，唔知妳幾時會出現喺我面前，打爆我個頭？」


男人唔可以窮 全文完

我自己都一路寫一路眼紅紅

都未講以娜 / 你老婆既現況

以後冇見過以娜

我老婆你地都唔識，講春咩

我老婆有睇我故仔，親口認有呷醋，但佢知個故仔入面既真偽，同埋佢好大方，知道每個人都有過去。

由Part 1睇到part 8 由cdrom睇到要開ac 正哥 我無乜特別想講 我只可以講 你出書既話 我一定會買

你係其中一個撐我最多既

巴打，sorrry,多口問句，伯母還仍安好嗎？

禽晚先打死左隻老虎

好多謝 好多謝大家
大家既留言今日我都一路有睇

所有既留言我都有睇，但因為今日出左去傾出書既野所以唔可以留喺電腦度答大家

呢個故事如無意外應該會兩個月內出到書同大家見面

呢個帖我想收集大家既感想，所以未必會一一咁答大家
如果真係有野想問，大家去FB PAGE都可以

http://www.facebook.com/pages/%E8%96%9B%E5%8F%AF%E6%AD%A3/523747357658672?ref=hl

故事對我黎講已經係一個好遠既回憶
基本上同我而家既生活係冇關係
所以我先可以整合番再打番出黎比大家分享

就算出到書
我依然只係一個普通既巴打
有機會諗到既話會再出其他同大家分享

希望大家記得薛可正呢條Hi Hi有幾Hi Hi
做錯過幾多決定
失去左幾多本來係佢自己應該有既野

再望番自己
希望大家都唔會有太多既遺憾

多謝大家!!!!

BTW 簽名會太傻的嗎我係唔會開
一開我就會開演唱會

Hi喊左 ...

紅棍都喊

二月新故 講天佑可勇

話時話有bug喎？如果同以娜冇晒contact even冇聯絡方法，點解會知道以信到而家都冇事

幾年後有fd提

書入面我會放三張插畫

大家覺得邊三個場境好?

有個投票，揀三個情境出黎做插畫

大家都去投下,thx!

http://www.facebook.com/home.php?ref=logo#!/pages/%E8%96%9B%E5%8F%AF%E6%AD%A3/523747357658672

當可正講話他匯咗錢到英國的時候, 其實已等於講咗佢同以娜之間依段感情的結果出來: 他最後係同以娜一齊.
因為以以娜的個性, 佢堅持要先照顧好家人先至處理自已既感情歸屬, 確實係好有責任感, 好難得既. 但係以娜係無能力一個人去解決佢屋企既麻煩事. 到頭來只係一個"累"字了得................

可正和以娜本身已經係彼此相愛, 況且可正匯錢到英國依件事, 等於表示可正是係有能力和意願去幫助以娜一家人, 依一招就會直接攻破以娜唔想結婚既心防, 110%有效...........

當初可正鋪排 "男人唔可以窮"依個故事的大綱既時候, 是準備要寫到可正出錢出力, 贏得以娜歸為終點, 來闡明作者心中原來寫 "男人唔可以窮"依個重點 (並非倫敦金既事....). 但如果小說係如是寫的話, 從一開始睇依篇小說所累積的憤恨, 失落, 悲情和遺憾, 到最後好可能留低一陣陣銅臭味 - 造成反效果...... 那就乾脆將小說定格係可正匯款, 等以娜打爆佢個頭為結局. 留比大家一個想像及回味的空間.......

無論如何, 故事係真的, 大部份對白亦係真既. 成篇小說都寫得好好. 只有小部份的對白 (尤其係以娜講既說話), 有小部份有一DD矯情 (提昇小說效果 ?!), 係唔符合以娜原來的既個性.

老實講句: 真係有好似以娜個性的絲打. 只係睇邊個巴打有咁既福氣"食得到"姐........

巴打見解我好開心

專登開AC黎留名 因為真係好感動 好似發生係自己身上咁
初初係YAHOO見到男人唔可以窮個TOPIC咪入去睇下
點知一睇就停唔到 終於等到大結局出黎 你出書我一定買
用番男人唔可以窮呢個書名我覺得好夠殺

add埋fb 投個票丫

做咩開多個facebook[]

用黎開fans page

校對到八點