至於陳瀅劇中色誘張智霖一幕被轟尺度過火，她直言有留意評論，希望大家不要只集中在女演員的衣着多寡而判斷：「作為演員係演戲，如果段戲淨係網上播又會唔會投訴呢？呢個係我職責範圍以外，唔到我控制。（唔開心？）冇，呢個禮拜過得好開心，因為生日。」她強調收到劇本時已有「全裸誘惑」劇情，監製於畫面呈現上有徵詢她的同意，拍攝時亦做足安全措施，她又強調全部由她真人演出，非AI畫面。
日前她接受好友梁靖琪（Toby）訪問，談到該場大尺度戲時，Toby踢爆：「聽聞有導演猛咁畀人睇，話『佢做到咁樣㗎可以』。」陳瀅直言訪問當日未有留意這句說話：「其實唔可以咁樣傳，犯法㗎！未播之前唔可以做呢件事，如果真係咁兒戲，唔止我哋有睇過，其他人一定有睇過，所以冇發生過。」她認為當中有很多說話在字眼上被扭曲發酵，繼而產生誤會，重申未有片花流出。
而高Ling今次沒有大尺度演出，即使出浴戲也是包住毛巾，問是否因她拒絕才沒有性感戲？她透露原先跟張智霖有場夫妻親熱戲，但她覺得劇情上未至於如此親密，與監製及張智霖商討後，覺得改為行花園較適合。
另外，本月22日生日的陳瀅未受風波困擾，日前與好友開派對，事後在社交網大晒收花靚相。
吳卓羲讚緋聞女友專業：做戲之嘛！
對於緋聞女友張曦雯在《璀璨之城》的裸露演出，吳卓羲透露拍攝當日也在場，大讚對方專業：「我覺得兩個字講完─『專業』，做戲之嘛！拍出嚟好睇同順住劇情去。」曾在劇集《大唐雙龍傳》中有露股演出的他，以過來人身份說：「我都拍過好大尺度嘅戲，好大心理陰影，好在都見得吓人。我同林峯拍時，導演到現場先話畀我哋聽要露，我同阿峯研究都覺得試吓啦！冇問題。」
另外，問到他與張曦雯發展如何，他再次叫大家給予空間：「幾好，總之開心就得。（約咗出街未？）唔話畀你聽，秘密。（林峯話你幾十歲係時候？）佢都係幾十歲先結婚，佢哋問我嘅話，我會親自交代。（帶埋張曦雯一齊交代？）搵日啦！最近我喺內地拍劇，基本上冇見過佢哋。」
