朱智賢偷睇謝東閔手機
朱智賢首度披露與謝東閔的八年情,其實早已亮起紅燈,自己曾因安全感盡失,而偷看謝東閔的手機。朱智賢憶述二人原本非常甜蜜,但隨著某些事情發生後,所以有所改變:「我開始變到無乜安全感,對佢無咗個信任喺度,佢做任何嘢,我都覺得唔知佢去咗邊度嘅。」朱智賢承認當時因搵不到人曾經發癲,疑神疑鬼猜測對方去了哪裡。
朱智賢指女人的第六感非常敏銳,當時開始察覺到另一半的日常習慣出現微妙改變,例如經常不見人、總是推搪沒有空:「我得閒就Check電話,Check佢乜、Check佢物,乜都 Check呀我?」雖然朱智賢內心不斷掙扎,極力說服自己要尊重隱私「唔好睇對方電話」,但最後仍忍不住偷看對方的電話,進而證實自己的猜疑,在謝東閔挽留下,二人拖拖拉拉多年。
朱智賢:我好愛謝東閔
在「蛋糕事件」後,男友謝東閔大方原諒,並陪伴朱智賢走出低谷,但兩人私底下難免存有隔閡。被問到既然關係不舒服,為何仍能維持八年?朱智賢眼眶泛紅表示:「得一個原因,因為我真係好愛佢。我睇返自己咁多年,我係好愛呢個人,我先會留喺佢身邊咁多年。」然而,在經歷長期的拉扯後,兩人最終在2024年11月宣布分手。
經歷這段長跑後,朱智賢對愛情有了新體悟:「我學到嘅道理就係,以後如果將來再遇到好愛好愛嘅人,我覺得唔適合嘅話,真係要狠心。覺得唔對路或者有問題,幾愛都真係要斷。我唔係一個好『斷捨離』嘅人,因為我唔捨得、我繼續,而最後受傷嘅,其實只有自己。」
朱智賢經一事長一智 停工期積極增值
回想起當年的感情風波,朱智賢承認自己在處理感情問題上很不成熟,形容這是一次沉痛但寶貴的教訓:「我一定係做錯咗嘅,喺呢件事上面,我覺得自己處理感情方面嘅問題係好差嘅,可以話『經一事長一智』。經過呢件事之後,我發覺自己領悟咗好多好多道理,知道有啲嘢係唔可以勉強,有啲嘢係要搞得清清楚楚。錯就要認,打就要企定。我唔會去俾任何藉口去解釋,錯就係錯,最緊要唔好重蹈覆轍。」
當年因為桃色醜聞,朱智賢的演藝事業遭受重創,原本接下的多部新劇一夜間被抽走,更迎來長達一年的「雪藏期」:「我等咗拍劇呢個機會,其實我等咗好耐。」面對前途的未知數,朱智賢當時選擇積極增值,在停工的一年間跑步、行山,並報讀了營養學文憑。
朱智賢八字被批「渣男磁石」 擇偶抗拒宅男
節目中,堪輿學家唐碧霞看過朱智賢的八字後,斷言她擁有「渣男磁石」命格,極易吸引花心的男性。唐師傅分析,這與朱智賢挑選男人的眼光及夫妻宮命格有關,因為她偏好外表優雅、帥氣、懂得甜言蜜語且幽默的男性,而朱智賢亦承認自己確實抗拒宅男。
最後,主持Brian問她一個「二選一」的假設性問題:「如果有一個好靚仔、有錢、專一又好錫你同屋企人嘅對象同你結婚,但代價是以後無得再拍劇,你會點揀?」朱智賢毫不猶豫地表示:「唔會變心?咁我揀嫁嗰個好過。」