中海物業聯同深水埗居民聯會，10月2日喺德貞女子中學合辦「國家安全長征路」主題活動，約120名師生參與。
據報學生先觀看長征紀錄片《為有犧牲多壯志》選集，再到「重走長征路」體驗區，接觸草鞋、紅軍帽同號角等物品，並獲安排試穿草鞋，感受主辦方所稱嘅穿着不適及過草地嘅辛苦。
活動獲深水埗民政事務處等支持，助理專員連啟晉親自為影片導讀，講解血戰湘江、爬雪山過草地等歷程；居民聯會理事長陳偉明則勉勵學生建立總體國家安全觀。
中海物業係中國建築集團旗下嘅香港上市物業管理公司。至於物管公司點解參與校園教育，公司副總裁王知剛今年5月喺系列活動啟動禮表示，合辦活動係落實習近平強調「賡續紅色血脈，傳承紅色基因」指示嘅具體行動，希望年輕一代學習團結、堅持同奮進，並稱公司會繼續同各界舉辦愛國文化活動。
呢項合作至少可以追溯至2025年，當時中海物業同居民聯會已合辦「中國歷史文化進校．區」系列，以抗戰勝利80周年為主題，王知剛亦表明會同更多學校及社團合作。今年系列改以長征勝利90周年為主題，5月啟動時已提出將國安意識融入活動，並安排校園及社區體驗、觀後感徵文等。上述活動報道未有交代各方出資額、教材審核程序，以及學生是否自願參與。
