琴晚係我生日，男朋友特意揀咗銅鑼灣「肉佐 NIKUSA」嚟慶祝，點咗最高等級 Level 4 壽喜燒，一共洗咗 $1,196（未計加一）。本來好期待，結果成晚都食得唔開心，真係好失望。和牛質地同啲合成肉冇分別。
第一碟標明「藏王和牛上肉」嘅肉已經冰到硬晒，成疊好似冰塊，分唔開亦落唔到鍋。我哋等咗大概十五分鐘都未解凍，最後惟有整疊掟落鍋度煮，一開始已經好掃興。之後點嘅串燒入面竟然發現有頭髮，真係好影響食慾，衛生令人質疑。
最令我在意嘅，係成晚實際食到嘅肉，無論色澤、脂肪紋理同口感，都好似合成肉、安格斯肥牛多過和牛。我有兩條短片作證據，標籤寫住「藏王和牛上肉」，但紋理同真正藏王和牛差好遠。根本就係安格斯，上錯左。
食飯期間亦聽到隔籬枱客人討論肉系似安格斯。單據清楚顯示我哋並冇點過安格斯肥牛片，但餐廳一路都以「藏王和牛」名義送上嚟，令人懷疑會否長期以其他肉類代替。
男朋友特意為我揀呢間餐廳，本想度過一個特別嘅生日晚餐，結果卻因為以上問題而大打折扣。我希望餐廳可以正式回覆同解釋，並說明肉品來源同加強品質與衛生管理。
