今日（9月1日）開學日，大角咀詩歌舞街有中學生遇交通意外。14歲男生乘坐父親駕駛的私家車返學，落車後被車轆壓住左腳掌受傷，送往廣華醫院治理。
現場是詩歌舞街45號聖芳濟書院對開，早上7時半左右，警方接報有私家車撞到一名14歲男學生，他腳部受傷。人員到場男學生清醒，由救護車送院治理。涉事私家車司機姓張（42歲），是男學生的父親。
目擊者金先生稱，男學生乘坐黑色的Tesla返學：「佢落嚟返聖芳濟，唔知漏咗咩喺車，佢面向架車；私家車個後轆唔知點解壓住佢隻腳。唔係成隻（腳），四分一左右。個媽咪叫個老豆『褪車、褪車』，但老豆話褪唔到。」
此時金先生見附近有警車，於是找來協助，而學校老師亦同時拿來椅子讓學生坐下，隨後學生經敷治後送院。依金先生觀察男學生傷勢無大礙：「嚇親囉！」
據了解，當時男生父親因應前方之交通情況而停車，其間男生從左後車門下車，其父疑不察覺開車，結果左後車胎壓傷其左腳。
