今年3月，富三代 #鍾培生(Derek）在淺水灣鍾家大宅，上演電影級規格的「進擊的求婚」，向「最年輕區議員」 #莊雅婷 求婚。當時已傳年僅26歲的莊雅婷有餡，求婚成功是雙喜臨門。同月二人宣布已註冊成婚。

今年7月初，鍾培生拖巨肚老婆現身開幕活動，才承認他將為人父，還揚言目標生夠六個，理想配額為「五子一女」。

由公開求婚至今，短短四個月內，鍾培生簡直上演人生快格！求婚、結婚、宣布老婆懷孕，到今日有傳鍾培生已經做埋老竇。《娛壹》收到消息，鍾培生於7.13(本周一)已為人父，先中「一女」quota。其餘五子配額，鍾家新抱肚皮繼續努力。

鍾培生早前接受《巴打圍爐》訪問，揚言想生夠六個，但老婆唔肯，他霸氣說︰「生一個娶你返嚟做乜L嘢！」至於點解要求「五子一女」，他解釋無法抗拒女兒撒嬌，因此嚴父人設，會被女兒破解，因此女兒一個就夠。「如果係仔，我可以控制佢，唔聽話就要佢出去跑圈，但女一撒嬌點算。我之前講過好多次，女一定要縱要貴養，乜都買俾佢，提高佢擇偶標準。如果係大仔，會叫Derek Cheung Junior，一定要繼承我，唔可以失敗，一定要成功。就算唔打比賽，都一定要學武術或格鬥技。」

訪問期間，他爆老婆一個秘密，「點講佢都會鬧我……佢係我fans。」指莊雅婷18、19歲時，已開始留意他，甚至在IG私訊主動搭訕。鍾培生說︰「佢有留意我，但我就冇理佢，佢DM我用啲好差嘅搭訕台詞，係幾有誠意，但通常有誠意都冇咁靚。」

他自爆從小已是「香港小姐選舉」擁躉，屆屆都會睇，更會私訊佳麗，留言加油打氣。去年莊雅婷面試港姐後受壓退選，鍾培生因DM留言加油，才發現她一早私訊撩傾偈。

這位曾食女無數的富三代，最後肯修心養性做人夫，是因被莊雅婷的賢良、聽話收服！「我收工夜，佢會問我有冇食嘢，肯起身親手煮飯俾我食。」莊雅婷又試過到公司接放工，見他工作忙碌未走得，會坐埋一邊默默等候，「佢叫同事唔好話我知嚟咗，唔打擾我，結果佢等咗我三個鐘頭。」又指他倆三觀一致好夾，不用刻意遷就，「過去啲女友，因太鍾意我而忍讓。」

求婚過程玩浮誇，結婚又豈會低調處理！鍾培生待老婆產後會補辦婚禮，屆時還把她當年DM撩搭訕的內容在婚禮公開。以鍾培生唔爆唔做的性格，如婚禮與百日宴一起辦，唔知呢場喜宴，又以甚麼電影級規格帶來熱話。

《娛壹》就已為人父的傳聞，求證鍾培生，但截稿前他未有回覆。喜訊報導後，他只在story透露︰「呢兩個星期收到好多大家嘅祝福，呢件喜事唔回應了，希望大家唔好Focus喺bb到，再次感謝大家祝福同關心。」